خصمي... أنا | البداية بقلم الكاتبة المبدعة هبة انس
الكاتبة زهراء الفتلاوي
مو كل معركة تصير وي الناس...
أصعب حرب...
هي الحرب اليسكنة بصدر الإنسان.
ذاك الصوت...
الكل يوم يكلك:
"تعبت... "
"خلاص... "
"ما بيك حيل... "
إذا صدكته...
خسرت قبل لا تبدي.
تره الدنيا مو قوية...
إحنا مرات نطيها أكثر من حجمها.
والخوف... مو ذنب...
بس الذنب تبقى عبد إله.
أنهض... حتى لو رجليك ترجف.
أمشي... حتى لو الطريق كله شوك.
وإذا طحت... لا تستحي من التراب،
استحي إذا بقيت بيه.
لا تنتظر أحد ينقذك... تره الناس تمشي بحروبها، وأنت وحدك تعرف شكد النار حاركة بقلبك.
أقسى خصم... مو الإنسان الوقف ضدك.
أقسى خصم... هو أنت... لمن تسمح لضعفك يحكمك، ولخوفك يسكت حلمك، ولليأس يكتب آخرك.
اكسر هالصوت... وخله يعرف...
أنك مو ذاك الإنسان الينهزم من أول عثرة.
خل الأيام تشهد... أنك عبرت التعب،
وعبرت الخذلان، وعبرت كلشي گالولك مستحيل.
لأن الرجال... والناس الأقوياء... ما يولدون أقوياء... ينصنعون من الوجع،
ومن الصبر، ومن ألف مرة انكسروا...
ورجعوا وكفوا، كأنهم أول مرة يواجهون الحياة.
وأذكر... إذا انتصرت على نفسك...
ما يبقى بهالدنيا خصم يگدر يهزمك.
